जयपुर में आयोजित राजस्थान रा सगळा सूं बड़े ब्यूटी पेजेंट 'मिस राजस्थान 2026' रे 28वें सीजन रो पैलो ग्रांड ऑडिशन अतवार ने घणो उत्साह सूं पूरो होयो। फ्यूजन ग्रुप कानी सूं रूवी डिजिटल और प्रीमियम सफारी रे साथे राख्या गया इण प्रोग्राम में पूरे राजस्थान सूं घणी संख्या में छोरियां पहुंची।

प्रोग्राम री डायरेक्टर एकता जैन बतायो के इण साल ऑडिशन में 1200 सूं बेसी हिस्सा लेवा वाली छोरियां आई। खास बात आ रही के सिर्फ बडा शहरां सूं ही कोनी, बल्कि छोटा कस्बां, गांवां और ढाणियां सूं भी छोरियां आपरो हुनर दिखावा आई। इण सूं ठा पड़े है के अबै राजस्थान री नई पीढ़ी रो रुझान फैशन और ग्लैमर री दुनिया में घणो बढ़ रयो है।

ऑडिशन रे बखत छोर्यां में फैशन और मॉडलिंग ने लेर गजब रो जोस देखण ने मिल्यो। घणी छोरियां तो आपरे मां-बाप और परिवार रे साथे आई। अठे एक और फूटरी बात आ रही के कई मां-बाप आपरे इलाके री पारंपरिक राजस्थानी वेषभूषा (पोशाक) में नजर आया, जिके सूं माहौल और भी रंगीलो होग्यो।

मंच माथे सगळी छोरियां आपरो आत्मविश्वास और फैशन सेंस बतायो। कैटवॉक करतां थकां जजों ने प्रभावित करवा री पूरी कोसिस करी। जूरी पैनल में फैशन जगत रा नामी चेहरा मौजूद हा। जूरी में निमिषा मिश्रा, जैस्मीन राणा, ट्विंकल पुरोहित, मीनाक्षी, ऋषिता, हीना ठाकुर, अदिति शर्मा, औरा विरमानी, दिशा भट्ट, अदिति ब्राह्म भट्ट और हर्षिका बत्रा ने छोर्यां रो टैलेंट पारख्यो।

आयोजक योगेश मिश्रा और निमिषा मिश्रा बतायो के अबै दूजा ऑडिशन रे बाद लगभग 100 छोर्यां रो इंटरव्यू होसी। जिके रे बाद 28 फाइनलिस्ट चुणी जावेली। इण 28 छोर्यां ने एक महीना तांई खास ट्रेनिंग (ग्रूमिंग सेशन) दी जावेली, जठे वांने रैंप वॉक, बात करवा रो तरीको और पर्सनालिटी डवलपमेंट सिखाया जावेला, ताकि वांने नेशनल लेवल वास्ते त्यार करयो जा सके।

प्रोग्राम में पवन गोयल (प्राइम सफारी), मुदित शर्मा (विवो), आलोक शर्मा (रूवी डिजिटल), आईएएस नीरज के. पवन, मुकेश माथुर (दैनिक भास्कर), पूर्व मेयर ज्योति खंडेलवाल और संदीप जैन सरीखा कई गणमान्य लोग मौजूद हा।

आयोजकां रो केणो है के मिस राजस्थान अब सिर्फ एक प्रतियोगिता कोनी रही, बल्कि करियर बणावा रो एक मोटो मंच बण गयो है। अबै गांवां री छोरियां भी आपरा सपना पूरा कर रही है और परिवार वाळा भी वांने पूरा साथ दे रया है।